اشتى وخلى الدنيا تفوق

weghtn@yahoo.com

اشتى وخلى الدنيا تفوق ...
اشتى وخلى الجو يروق ...
رخى فـ مره ... جوه وبره
طول أيامنا بتشتى لفوق
عاجبك حالنا اللى محيرنا ؟
واللا الليل اللى ممسينا ومصبحنا ؟
شمسك ليه بتحب العتمه ؟!!
من كام سنه بنغنى يا سالمه ..
روحنا وجينا ...
وفقر الدنيا بيحضن فينا
هوه مفيش للضلمه شروق ؟!!
اشتى وخلى الدنيا تفوق
اشتى وخلى القلب نضيف ..
اشتى غموسك ...
طول العمر معايا رغيف ..
بااحلم بالأكل اللى يغذى
يمنع عنى البرد فى ليلك ..
أو يحمينى فـ شمس الصيف ..
قلبى شراقى وكله شقوق ..
حلوه اللمه على الطبليه ..
بس بشرط القلب يدوق ..
اشتى وخلى الدنيا تفوق ....