أخيرا شفت يوم عيدك ...

أخيرا شفت فرعونك بيتنحى وأنا عايش ...
ويركع والشباب واقف ... مطالب شعب مش طايش
وبيغنى الوطن ألحان ...
وأوتاره عيدان القلب لحظة ما النظام ناشذ ...
ومرسومة غيطانك م الورود ألوان ...
ومرصوف الطريق للكل
تعالى بصى م البلكون فى أحلى ميدان
هتلقى شعبك المطحون هنا طالع بألف لسان
يبوس الأرض ما دامت بتتطهر ...
ويحضن وردك الدبلان . يقول له بكره هتنور
ملامح شعب بيكبر وبيحرر بلد مسجون
ويعلن فرحته بيكى ...
وساعة الأزمة يحميكى
عنيهم تحضن الأوطان ...
ملانة خير يكفيكى ... وعمره ما طمع فيكى
كتير ظنوكى بتموتى ... ما دام ساكته على الطغيان
أتارى صبرك الطوفان
وجمرة نار فى وش اللى سرق أو خان
صحيح الدنيا دوارة ... وبعد الصبر يا غالية خلاص راحوا فى خرارة
وأنا مذهول بأفعالك
صحيح إنك بتنتفضى ؟!!
خلاص صدقتى وعرفتى ؟!!!
وشبيتى عن الطوق اللى كان منحوس
وبيضا ثورتك يا مصر ...
وسهلة شكة الدبوس
وبـ"الفاسبوك " !!!
يا بنت الإيه !! ياريتنا من زمان بنشك
أخيرا شفت عشاقك ... يبيعوا الدنيا فى ثانية
وبيبوسوا فى أعتابك
ومش راضيين ... بأى حوار مع العملا أو التجار
وظالم ... لسه ما شبعشى بكام مليار
خلاص العصمة فى إيديكى وطلقتيه ...
ما كان من بدرى يا غالية كده تبريه
ما دام معيوب ومش نافع تعالجى فيه
ما هوه اللى بنى الأسوار ...
قطع أرحامك الطاهرة مع السودان
وفضى النيل ... من الخير اللى كان أنهار
وجاب العار ...
فتح شريانك الفضى وساب الديب على بغداد ...
خلافة دولة الإسلام ...
وقبل الغرب ما يضحى دبح صدام !!!
وحاصر حلمك الأعزل .. وباع الغاز لإسرائيل
وكان مخلص لأعدائك ... وقسم ورثك الباقى على الدلاديل
أخيرا شفت يوم عيدك ...
وشفتك خارجة فى ثورة ...
وإيد الكل فى إيدك ... وشفتم وإنتى بالترحة
وفستانك على قدك
عليه حتة بروج ألماظ !!!!!
بيفضح ناسك الفالصوا
يعريهم وربك فى العلا حارسه
وتانى دارت الأيام ...
وأنا با أديكى مصروفك ... وياما خت من إيدك
فمدى الإيد ما تتكسفيش
خدى عمرى أنا عيديه ... وعمر ولادى بعديا
وما يكفيش ...
وعشتى رمز للثوار

وراية تحرس الميدان

ودام الفرح فى عينيكى

وما يؤمر عليكى جبان

حدوتة ما قبل الحكم

نـَمْ هَادِئـًـا مُطمَئِنـًـا أيُّهـَـــا الوَلـَـــــدُ
إنـِّـى هَدَيْتــُـــكَ شَعْبـًــا لَيْـسَ يَتَّحـــِـــــــدُ

إنِّى الخَبيرُ بتَرْويضِ الشُّعـُـــوبِ إذا
مَا نـَـــدَّ فــَــرْدٌ أتَانـِـى الكـُـــلُّ يَرْتَعــِــــــدُ

دَعْ عَنْكَ خَوْفكَ وَالْق الكـُـلَّ مُبْتَسِمـًا
إنَّ المُلـُــوكَ عَلى التَّخـْويـــفِ تَعْتَمـِـــــــدُ

نَمْ لا تَخَافُ مِنَ الإصْبــَـاح ثَائــِـــــرَةً
إنَّ الشُّعــُـــوبَ عَلى أوْجَاعِهــِـــــمْ رَقَدُوا

تَلْتَفُّ مِنْ حَوْلِهــِــمْ أحْبــَـــالُ مِشْنَقـَةٍ
يَسْتَعـْـذِبُ المـَـــوْتَ مَنْ لِلْمَوْتِ قَـدْ وُلِدُوا

هَلْ بَعْدَ أنَّ الهَـوَا لِلنـَّــــــاس نَشْريــهِ
تَخْشَى الجُمُوعَ ؟! أمَا لِلظُّلمِ قَدْ سَجَـدُوا !

لا يَفْزَعَنَّكَ أنْ " تُونُسْ " بهَا غَضَبٌ
فالنَّاسُ فِى مُلْكِنــَــــا لا قلـْـــبُ لا جَسـَـــدُ

المَاءُ مِنْ تَحْتِنــَــا يَجـْـــرى بأعْيُنِنـَــا
وَالشَّمـْـــسُ مِـنْ أمـْــرنَا تَدْنــُــو وَتَبْتَعـِـدُ

كُرْسِيـُّـكَ الغـّـــرُّ إنـِّـى الآنَ أصْنَعـُــــهُ
فاهْنَأ صَغيــــــــــرىَ فالتَّوْريـــثُ مُلْتَحَـــدُ

حَدُّوتـَـــةُ النـَّـوْم أنْتَ الآنَ تَسْمَعُهـَــا
لا تَنـْـــس أنْ تَحْكِهــَـــا يَوْمـًـــا لِمـَـنْ تَلـِدُ

22 / 1 / 2011

... ارحل بقى ..................................................

ارحل بقى .....
قلبي على حلم البلاد
لحظة ما بيسابقوا القمر
ويكسروا كل الحواجز ...
والحدود ...
دايبة على كف البشر .
مارد وثائر على الفانوس
بيجيب من الغيب القدر .
الله على لون الغضب
لو كنت جنبي وشفتهم ...
عمرك ما تعرف إيه ملامحك وسطهم
الصوت على رووس الجبال ...
وسط الشوارع والبيوت
صوت الشيوخ ... حتى العيال
يمحى الشقي ....
ارحل بقى .
ما خلاص كسرنا الشرنقة
وخرجنا م القمقم ...
جمعنا كل عيدانك الناشفة
رميناها جوه المحرقة
ارحل بقى .
شعر العيال شايب
حتى الرجال لو يضحكوا
يستغربوا .. ويقولوا يمكن خير
والضحك متعايب .
والفرحة فستانها هنا
من بختنا ..
جوه الهموم دايب
وما عدش غير ...
حبة هدوم متفرقة
ارحل بقى
العنف إنت اللي ابتديته من زمان
واللا انت ناسي البرلمان ؟!
لحظة ما قطعتوا اللسان
انت اللي خرجت السجون
وانت اللي غطيت العيون
علشان ما يحموك السنين
وانت اللي ضيعت الأمان ..
وانت اللي عامل جوه بيتنا مننا ...
مليون سجين ...
بالصولجان .
طب فين رجالك يا أسد ؟!!!!!!
متخفيين زى الفيران
وسابوك ف دولة مخرَّقة

ارحل بقى
لسَّاك مقاوح بعد كل اللي جرى ؟!!!!!!!
الكل باعك ... والشوارع مجزرة
وكلامك الماسخ ... عمال يزغزغ ف الودان
نسمع نقول بلا مسخرة
ميت وماسك مطرقة !!!
ارحل بقى .
الجمعة 28 / 1 / 2011