البيت مش بيتك

تعليقًا على موضوع الضرائب العقارية

ده حرام عليكى بيتى ملكى ... تملكيه

ده حرام عليكى شغل عمرى أو شقايا ... تسرقيه

بتقولى حقك .. والحق عمره ما يتنسيش

يا خى كسر حقك ...

إنتى إيه ما بتشبعيش ؟؟!!!

ختى عمرى ومات أبويا ..

وختى منى لما سابك برضه اخويا ..

ختى فرحى .... وعز طرحى ..

طب فكرينى انا خت إيه ؟!!

يبقى ضهرى اللى انكسر ..

أيام قضيتها فى السفر ..

عشان اوفر كام جنيه ..

وحرمت نفسى م الولد ..

عايش حياتى بدون سند ..

واصبر واقول هانت خلاص ..

والصبه بتهد الأساس ..

وابنك يغلى فى الحديد ..

أرجع وأبدأ من جديد ..

ورجعت ليــــــه ؟!!!!!

بقى يوم ما جيت ... وبقالى بيت

وحلمت الم ولادى فيه ...

عايزه ببساطه تحلبيه ؟؟!!!!!

والله ده انت بجد قادره

واهو ياما فى الدنيا بيجرى ..

طب سيبى حته فـ قلبى منك ..

لو جت مصيبه تنجدك وترد عنك ..

والا اقولك ....

هاتى حد وحكميه ..

مين اللى جرى النيل فى أرضك ؟

مين اللى خضر لك فى زرعك ؟

مين اللى طول العمر شايلك ؟

مين اللى عمر ... واللى حرر ..

واللى شمر ؟ لاجل أم الدنيا تكبر

واما يكبر بتراضيه ...

مين اللى قالك إنه بانى ؟

مين استلف لك لاجل رخصة للمبانى ؟

ما يكونش باابنى فـ ملك تانى !!

والله ده انت مغلبانى

ممكن سؤال لو تفهميه ..

يبقى نخلص ..

هاتى م الآآآخر يا غاليه واسمعيه ..

البلد دى عاوزه إيه ؟؟؟!!!!!!!!!!!!!!!!!