اشتى وخلى الدنيا تفوق ...
اشتى وخلى الجو يروق ...
رخى فـ مره ... جوه وبره
طول أيامنا بتشتى لفوق
عاجبك حالنا اللى محيرنا ؟
واللا الليل اللى ممسينا ومصبحنا ؟
شمسك ليه بتحب العتمه ؟!!
من كام سنه بنغنى يا سالمه ..
روحنا وجينا ...
وفقر الدنيا بيحضن فينا
هوه مفيش للضلمه شروق ؟!!
اشتى وخلى الدنيا تفوق
اشتى وخلى القلب نضيف ..
اشتى غموسك ...
طول العمر معايا رغيف ..
بااحلم بالأكل اللى يغذى
يمنع عنى البرد فى ليلك ..
أو يحمينى فـ شمس الصيف ..
قلبى شراقى وكله شقوق ..
اشتى وخلى الدنيا تفوق ...
اشتى حنانك ...
يمحى قساوة قلب الكون ..
خلى الرحمه تعيد الرحمه ..
بين الاخوات وده مهما يكون ..
حلوه اللمه ع الطبليه ..
بس بشرط القلب يدوق ..
اشتى وخلى الدنيا تفوق ......
قصيدة جميلة ربنا يبارك: الاسلوب مختلف المرة دى عن قصائدك السابقة صح
ردحذفبس لى بعض الاستفسارات: خلى الرحمة تعيد الرحمة بين الاخوات وده مهما يكون ؟ مش واضحة لى واشمعنى الاخوات ولا دى القافية المناسبة ارجو التوضيح الله يكرمكم
أخى الكريم / روح وريحان
ردحذفحينما تغيب الرحمة تتقطع الأرحام لهذا كانت الأمنية ان تعود الرحمة بالتجانس الرحمى مرة أخرى
قصيدة جميلة جدا بارك اللة فيك ولك
ردحذف