من بعد ما هديت كل الجيوش جوه الميدان ما تيجوا نحسب كام شهيد ... عاشوا واللي ماتوا كام جبان ؟!! والدم جامد في الوريد .
فيه كام مبارك مش مبارك وسطنا ! فيه كام نظام من غير نظام بيضلنا ! فيه كام هدف بيمد إيده يشدنا ! وإحنا هنا بنقول خلاص .. الثورة كانت حلمنا ... وده مش صحيح الثورة مش إنك تغير زيد بعمرو الثورة مش طبال وزمر الثورة دم وحلم جيل ... حالف يجيب المستحيل الثورة كوبري للحياة ميهمهوش ضيق الطريق المهم إن الولاد يلقوا شط بدون غريق
الحلم لسه كبير يا قلبي ... أوعى تتعب م الجروح واحضن أمبارح بيومك ... واصنع المركب يا صاحبي زى نوح خلى كل الناس تنكت أو تهزر بكره ييجى اليوم ونفهم كلنا من غير شروح إن دم الشهدا حي وانك أنت جاى جاى ... نور وضى
بس قلبي لسه خايف م الكابوس والكابوس بيجينى دايما إني مقطوع اللسان والشهيد جوه الميدان جاى يسأل انتصرتوا واللا لأ ؟! وأما شاف إن الكلام بنزقه زق قال حرام تخربوا بيتكم بأيدكم ... هي دى قيمتي ما بينكم ؟!
ده أمي لسه بتبكى دم صرخة حلم وصرخة هم ... كنت خارج في المظاهرة ... صوتها خارج بينادينى خايفة بكره م المخاطرة ... يا بني يا زهرة سنينى ده أنت عندي حلم عمري ... فيه كتير غيرك يا نضرى هيه يعنى مصر خلصت إلا منك ؟؟؟!!!!!!!!!
شكله فاجر والرصاص عنده ببلاش .
وحياة غلاوة أمك بلاش وانكفيت على أيدها أبوسها ... متخافيش لو هااعيش مسجون في بلدي يبقى حلمك ضاع مفيش إنتى عاجبك إني قاعد جنب منك ليل نهار ؟! بكره يامه العيشة حلوة ... بكره مصر تبقى غنوه بكره نضحك من قلوبنا ... بكره عمرانه جيوبنا بكره هنصد التتار . بكره نبعت كسوة الكعبة الجميلة من هنا بكره لو طلبوا المدد ... يلقوا المدد من دمنا بكره أم الدنيا ترجع ... مش كتير على ربنا بكره يامه تبنى حلمك في العمار بكره آخر يوم يا غالية ... إفرحى هتقولى غار
بس أمنتك أمانة ... لو أراد ربى الشهادة تفرحي وتجمعي كل الحبايب والجيران إبنى عمره ما كان جبان ... إبنى راجل ...
إبنى حاجز عند ربه هناك مكان إبنى جوزته حورية في الميدان ... مش عروسة والسلام شفتها ليلة ما جاني في المنام ... بتقول لي يا امه اليوم ده عيد زغردى ياام الشهيد كله ميت ... لكن ابنك لما جانا أتولد هنا من جديد روحه طاهرة ... أصله مات وسط المظاهرة
ولقيتنى محتار في الجواب والشهيد بيعيد سؤاله بالعتاب
انتصرتوا واللا لأ ؟!! وانكسفت من الإجابة لسه بنصارع في روحنا ... لسه بنزود جروحنا والحسابات القديمة ... واللي كان ضدك يا صاحبي ... اللي شوه يوم خروجك اللي قال إنك مخرب ... بيقول دى ثورة كات عظيمة
وانه شارك في القرار ... وانه خطط فئ المكان
وانه كان وسط الميدان وانه حرك كل حاجة ابن القديمة . والفتاوى والبلاوى ... والى خطط واللي ناوي ... كله بينقط يا صاحبي ... أمال إيه ما الكل غاوي
يعنى سلمتم دمانا للضياع ؟! واللي شاري عندكم زى اللي باع !! والله انتوا الخسرانين لأ يا صاحبي أوعى تحزن ... ده انتوا رجعتوا السنين إنتوا أمنتوا اللي خايف ... شبعتوا كل المحرومين كسرتوا جدران الشفايف والسنان ... واللسان مبقاش سجين إدونا فرصة نلضم الإبرة برموشنا ... نغزل التوب الجميل كله لسه مش مصدق إننا حققنا ثورة والله كله مش مصدق ... النور شلناهم إحنا بالمناورة
جبنا بكره قبل بكره ... كله تايه كله خايف ييجى فرعون من جديد .. جايب ابنه أو عصابته والوطن يرجع عبيد . شكلك أهبل يا البعيد !!!!!!!!! أنت مش دقت الحلاوة باللسان ؟!!
هيه فركة كعب توصل للميدان
قول لكل الشعب يجمع للتمام
وأما تلقى الكل حاضر ... بلغ أمي تبقى حاضرة في المكان قول لها حان الأوان. وإني مستنى قدومها ... نفسي أبوسها... نفسي أدارى ف هدومها نفسي تفرح زى فرحى ... نفسي أداوى لها ف جرحى بعد موتى
نفسي أقول وبأعلى صوتي : إن حتى الجنة عندي بدون وجودها متساويش يامه أمنتك أمانة ................. متغيبيش
17 / 3 / 2011
