افتح الكراس وسمى يا تاريخ باسم الإله علم الاولاد فى حجرك يعنى إيه كلمة حياة شد خط وحط نقطة وابدأ الدرس الجديد عنوانه بالبنط العريض يعنى إيه كلمة عرب يعنى راس جنب السحاب يعنى فاتورة حساب للطغاة وقت الغضب هيه دى كلمة عرب
يعنى طير فارد جناحه يعنى جيش مالك سلاحه صفحة بيضا والحدود ملغية فيها يعنى شعب بطاقته سارية م المحيط لما الخليج يعنى لقمة تكفى عيلة أو قماش يعمل نسيج
اقلب الصفحة وعلم صح فوق كل الشعوب كله صابر كله كان سهران يذاكر كله قلب فى الدفاتر
شاف عرابى والخديوى شاف جميلة والجزائرى فى الجزائر والعظم كان بيحب سوريا شاف عمر فى قلب ليبيا شاف إيدينا لما هدت خط بارليف ع العساكر شاف سليمان بن خاطر أو بو عزيزى لما طفى النار فى تونس شاف حسن البنا قام يبنى الضمائر شاف شبابنا اللى كان الشعلة فى ثورة يناير شاف هنية شاف ياسين شاف إيديكى الطيبين ع العرب والمسلمين
شاف علم للوحدة نايم كله متقسم غنايم كله فاطر لما كان الحب صايم واجتمعنا فى الفصول هيه نفس التختة والدكة القديمة ع الجدار صورة لمارد كل أعضاؤه سليمة بس طرف الصورة متنى والجدار بيقول ياريتنى كنت عارف بالرجوع
واللا اقول لك مش مهم إنى ابقى عارف المهم إن انتوا جبتوا م النهاية تونس الخضراء البداية مصر والبحرين حكاية واليمن تحضن فى سوريا والولاد بيجيبوا ليبيا م الجبان طب كنتوا هاتوا معاكوا حتة م السودان أو كنتوا جمعتم اخواتكم فى العراق وأختكم فى القدس برضه ليه ما جتشى لساها بتصد القذايف والأباتشى واللى خلف قالوا عمره فى يوم ما ماتشى
ألف حمد الله يا دولة ع السلامة والقرار بعد المداولة كان علامة شبكوا إيدكم فى حضنى رددوا أحلى نشيد من جديد الوحدة راجعة من جديد تجمع العيلة قريب أو بعيد أمة واحدة يعطس الراجل شمالها شمته صاحبه اللى قاعد فى الجنوب
ارفع الأعلام وحيى يا تاريخ كل الولاد اللى كانوا فى الميعاد علم الدنيا بحالها إننا إحنا الوطن من قبل ما يكون الوطن إحنا كنا إحنا جينا وبإيدينا إحنا هنكون اللى جاى قلب واحد كلمة واحدة زى واحد عملة واحدة ثورة واحدة رجعت فرح البلاد والمهر كان الدم أغلى م الدهب هيه دى كلمة عروبة هيه دى كلمة عرب
30 / 3 / 2011
ليست هناك تعليقات:
إرسال تعليق