لما المخرج إدى اشارته
فجاة المسرح فتحوا ستارته
لسه هاسقف
زعق المخرج طفوا النور
لسه الشيخ مالبسشى عمامته
قالوا ندخل حد بداله
زقوا صاحبنا وقالوا اتكلم
قال طب صورة ... الناس بتسلم
لابس جينز
وحاطط جله
قاعد فوق الكرسى مدلدل
جنبه صحابه وكل الشله
واحد يسأل عن إخواته
اللى قاطعهم لاجل مراته
واحد قال له ازاى راح انام
أو نشرب وندوق الزاد
لما الأقصى ف إيد أعداءنا
واحنا بنحلم فى الأحلام
واحد قال طب مااحنا كتير
ليه مانثورشى وللتحرير ؟
واحد يسأل عن أمواله
ف البنك يزود راسماله
زعق المخرج :: يابن ال....
قاعد ساكت ومابتردش
سمع دورك وما تسكتشى
والله خسارة فلوس الكوتشى
فجأة صاحبنا بدأ يتمطع
فوق الكرسى نزل يتمرجح
رايح جاى على خشب المسرح
مرة يصبح ... مرة يمسى
يخبط راسه بكلوة إيده ...
أيوه أنا جبت ده كله لنفسى
قال الفتوى ...
أيوه الفتوى ...
بصوا الفتوى بخل وتوم
تبقى ذخيرة لآخر اليوم
اللى بيسأل عن إخواته ...
لو كان راجل يكفى مراته !!
أما البنك وجوده ضرورى
للمكوجى راح يكوى عليه
لو هنحرم شغل البنك ...
حد يقول لى هنكوى بإيه
قالوا الأقصى والتحرير ...
قال : لأ . إنسى
إلا الأقصى والتحرير
ده خط وأحمر
بنط كبير .....
التحرير ده ميدان وبتاعنا
ولا يمكن هنفرط فيه ....
لحقه المخرج ... والمنتقبة ؟
قال منتقبة !!
دى هيه النكبه
عادة ومسكت فيها الناس ...
لاهى م الشرع ولاهى م الدين
ليه هنغطى جمال الكون
بيضا و سمرا تسر العين ...
حتى الشقرا تفوق الاتنين
أنا مش شيخ ولا كنت المفتى...
لكن حافظ نص القصة
من كام سنة باحلم بالدور
وجت الفرصة
رميت العمة
شكل الشيخ ولابس طرطور
:: حلو يامخرج ؟
:: طبعاً رائع ... ده انت بطلنا وليك الجايزة ...
جايزة نوفل للتنوير
والناس تحدف قشر الموز
واحده تهيف ...
واحده تصيبه ف عينه الجوز
والناس تحدف بالبطيخ
شيلوا صاحبكوا وهاتوا الشيخ
فين وديتوا الراجل الأوحد ؟
فاهم دوره لآخر المشهد ...
صرخ المخرج طفوا النووووووور
شالوا صاحبنا لأقرب معهد ...
للأورام راكب حنطور
والكومبارس ف ريحه بتسأل :
مين هيمثل بعده المشهد ؟!!
قال ولا ممكن ...
عمرى ماهدى لغيره الدور ..
عمرى ماهدى لغيره الدور
ليست هناك تعليقات:
إرسال تعليق