قــــــول يا وطــــــن

** القصيدة من ديوان ( من نبض القلم )

ما تقولى مين يا وطن غير قوانينك ؟.

خلاك في لحظة غضب 00 تقطع شرايينك ؟!

خلاك تبيع الوداد 000

والولاد 000

حطيت إيديك ع الزناد

خرجت رصاصة ف الفؤاد 000 صابت محبينك !!

ما تقولى ليه يا وطن بايع ومش شاري

لو كنت خد ت التمن 00 قولها وما تدارى

خليك جرئ يا وطن لو مرة ف وجودك

اصرخ وقول كلمتك 00

ماتزيدش ف سكوتك 00

بين لي فين سكتك 00 وريني آخر خطوتك

خليني أبيعك يا وطن مادمت مش شاري 000

ماتقولى إيه يا وطن خلاك تبيع ناسك ؟!

ما إحنا صبرنا سنين وشربنا من كأسك

طول عمري عايش بحبك مكتوى بنارك 000

نفسي يزيد الخير 00 والمر يحلا لك 00

والخاين الغدار عايش لإفلاسك

كبدى عليك يا وطن إنت الوحيد بتموت

الكل عايش 00 وفاكر 00

كل الهموم بتفوت 00

لكن همك هاممنى عايش ف وجداني

صحانى وسط الليل 00

خلاني شفت الويل

أصرخ وأقول يانى 00
آهين ياأحزانى000
من ذل أوطانى 000

وافضل أعيد السؤال بالشجن

متقولى مين يا وطن 00

متقولى ليه يازمن 00

متقولى فين المؤتمن 00

قضيت حياتي أنتظر 000

نفسي ف يوم بيك أنتصر 000

وأرفع جبينك يا وطن 00

حتى ولو 000

ابقي التمن 0000